في العالم العربي تعيش

في العالم العربي تعيش
كما قط ساكن تحت عربية
عينيه ما تشوفش م الدنيا دي حاجة الا الجزم
في العالم العربي تعيش
كما بهلوان السيرك تحتك بهلوان دايس عليه
وفوق دماغك بهلوان دايس عليك
والكل واقف محترم
في العالم العربي تعيش،
مباراة بقى لها ألف عام
لعيبة تجري يمين شمال
والكورة طول الوقت في إدين الحكم
في العالم العربي، تقول للبنت حبيتك
وتبقى البنت بتحبك، وبتموت فيك
تناولك بالألم
في العالم العربي تعيش
تشتم في طعم المية والطعمية والقهوة وروادها وفى مراتك وأولادها وحر وزحمة الأتوبيس
وفي اللي بيعمله إبليس، وفي التفليس
ولو سألوك تقول الحمد لله ربنا يديمها نعم
في العالم العربي تعيش، كما دمعة في عيون الكريم المحنة تطردها يرجعها الكرم
في العالم العربي تعيش تلميذ في حوش المدرسة من غير فطار عينه على الشارع وبيحيي العلم
في العالم العربي تعيش، بتبص في الساعة وخايف نشرة الأخبار تفوت
علشان تشوف ع الشاشة ناس
في العالم العربي
تموت
تميم البرغوثى

تحفه بجد يا مريم فعلا قصيده جناااااااااااااااااااااااااان وبصراحه كلها احلى من بعضها والله كنا مفتقدين للقصائد بتاعتك دى

ربنا يخليك يا احمد شكرا لمرورك الرائع

» الاغنياء والفقراء ف العالم
» أبو ظبي الاولى في العالم تتزود بالطاقة الشمسية
» لو بنت رومانسيه حكمت العالم تفتكروا ايه الى حيحصل!
» الااغنيه التى غنااهاا العالم بجميع لغاااته ....